(أبهدم بيتكم ) و( ام الخير ) ,,,رآئعه

**صيتهـ شآد آوغلو** الأربعاء يناير 28, 2009 3:14 pm

&بسم الله الرحمن الرحيم &

(( اللوحه الاولى ))
هيله شخصيه طيبه عمرها في الثلاثينات عندها ثلاثة اطفال وزوجها موظف في شركه كبيره وحالتهم الماديه ممتازه ما يعطيها مصروف في يدها شهريا بس ما يقصر عليها اذا راحت السوق ولا عند اهلها يعطيها زياده على طلبها
في يوم سجلتها اختها في منتدى نسائي وصارت تدخله يوميا وتقراء من هنا وهناك حتى شافت موضوع مكتوب كم يعطيك زوجك مصروف
والاغلبيه كتبوا يعطينا مبلغ كذا وكذا والاقليه قالوا ما يعطينا وكتبت هيله ما يعطيني مصروف على نياتها

كتبت ام الخير
اذا الزوج طيب ومو مقصر معي في شيء خلاص مو لازم اطلبه واستحي اصلا اطلبه وهو بيشيلني من على الارض

جات العضوه ابهدم بيتكم وقالت يؤؤؤؤؤؤؤؤؤؤؤ ما يعطيك مصروف ومثل ما قلتي راتبه كبير اكيد انه يضيعها على خرابيط لازم تتطالبينه بالمصروف واذا رفض روحي بيت اهلك ولا ترجعين حتى يوافق و اطلبيه نص الراتب عشان يتأدب هالرجاجيل يبي لهم الي يوقف لهم
شافت هيله رد العضوه ابهدم بيتكم وجاها الشيطان وقال لها اي والله انها صادقه هالبنت انتي مغفله كل الحريم ازواجهم يعطونهم مصروف الا انتي نكدي عليه عيشته اليوم ولا ينام الا معطيك المصروف طبعا هيله بعد وساوس الشيطان وكلام ابهدم بيتكم حست نفسها مظلومه
دخل ابو محمد البيت من العمل هلكان
ابو محمد : السلام عليكم
هيله :وعليكم
ابو محمد خير يا ام محمد احد مزعلك !!
هيله :لا
ابو محمد يقرب منها ويقول ما عاش الي يزعل ام محمد قولي وش في خاطرك
هيله : ابي فلوس
ابو محمد ابشري كم !! بس ما فيني اليوم انزلكم السوق تعبان
هيله لازالت مكشره وابو محمد في حيره من امره راح الدوام الصباح وهي ما فيها شيء وراها زعلانه
هيله :ابو محمد ابيك تعطيني مصروف شهري
ابو محمد: ليه قصرت معك في شيء يا ام محمد
هيله : لا بس ابي مثل الحريم كل شهر تعطيني هم احسن مني يعني
ابو محمد : ابشري هذا الي مزعلك بس ولا يهمك كم تبين كل شهر
هيله :ابي نص الراتب انا والعيال
ابو محمد : وعلى وجهه الف علامة تعجب طيب ابشري بس من وين بنسدد الايجار وراتب الشغاله وراتب السواق وقسط المدارس للاولاد وكيف بنسافر في الصيف وكيفبنوفر لبيت العمر .. وكيف .. الخ
هنا كأن عقل هيله رجع لها ولما جات تحسب المصاريف الي ذكرها ابو محمد قالت في نفسها والله اني مو صاحيه اثاري كل هالالتزامات وراه وانا لي وجه بعد اطالبه لا وقال لي ابشري بعد والله اني موب صاحيه
قامت قالت خلاص يا ابو محمد اصرف نظر ما حسبت حساب كل هالمصاريف تبيني اطلع الغدا !!

قال الرسول صلى الله عليه وسلم من ماتت وزوجها راضي عنها دخلت الجنه
في حديث المصطفى صلى الله عليه وسلم :
المرأة اذا صلت فرضها وصامت شهرها وأحصنت فرجها وأطاعت بعلها فلتدخل من اي ابواب الجنة شاءت

اللوحه الثانيه
رنا بنت جامعيه عمرها 22 سنه حلوه ووجهها طفولي وحلو بس سمرا شوي لونها قمحي حلو
وامها وابوها مدللينها وما ناقصها شيء واثناء جولتها النتيه
دخلت مره هالمنتدى النسائي السابق ذكره ولفت نظرها موضوع مكتوب انا سمراء وما احد خطبني ووش الحل !!
طبعا العضوات الي كتبت خذي خلطة تبييض والي كتبت هذا نصيبك و.. و.. و..الخ
فيه عضوه اسمها ام الخير كتبت رد على الموضع وقالت فيه
السمر حلوين وشوفي الاجانب يحترقون في الشمس عشان ياخذون هاللون خليك واثقه من نفسك والي ربي كاتبه لك ارضي فيه ونصيبك مكتوب عند رب العالمين وعليك بالصلاه في الاسحار والدعاء

جات العضوه ابهدم بيتكم وكتبت
اكيد ما احد يخطبك عشان هالسبب لو انا ادور لاخوي ما باخذ له سمراء روحي دوري لعمرك شيء يبيض قبل ما يفوتك القطار ترى ما يبون الا البيضاء وخذي هالكريمات خلطيهن مع بعض وشوفي كيف تصيرين قشطه
قام الشيطان يوسوس لرنا قال لها شفتي العضوه الي اسمها ابهدم بيتكم تراها صادقه ولا وشو له عمرك 22 سنه وما انخطبتي ..!!
لانك سمراء ما احد يبيك يبون البيض
وقام الشيطان يوسوس لها حتى اقتنعت بكلامه عفوا اقصد كلام ابهدم بيتكم
قامت اخذت خلطات ابهدم بيتكم و تدور في هالنت الخلطات لتبييض وتجربها على نفسها بعضها ما نفع وبعضها سبب لها حساسيه وبعضها بيضها اسبوعين وبعدين رجع لونها حتى جربت خلطة اسمها الطامه الكبرى حطتها باليل ونامت وقامت الصبح تغسل الخلطه الا تشوف لطخات بنيه على وجهها اغمق من لون بشرتها وتغسل وتفرك وتفررك ما فيه فائده قامت اخذت موعد وراحت لطبيب قال لها انتم مجانين تحطون اي شيء في وجوهكم !! اجل الصيدليات مليانه كريمات لتبييض مرخصه من وزارة الصحه ليه !! يلعبون يعني !! ولا ينتجونها عشان تخلطونها مع بعض !!
قام الدكتور خاصمها وهي ساكته لانها تبي حل لمشكلتها اعطاها دواء وقال استمري عليه وما ادري اذا راح يزيل الهباب الي حطيتيه في وجهك او لا وراجعين يبعد اسبوعين
وراجعته بعد اسبوعين اختفت الاثار تقريبا ولكن بقي الشيء الخفيف منها ما يبين الا اذا قرب الشخص لوجهها بس ما فيه فائده ما راح تروح راح تبقى معها طول الزمن بعد الوجه الطفولي الناعم

وقفه
ايمانك وطهارة نيتك مفتاحك لقلوب البشر

اللوحه الثالثه
منيره متزوجه محمد من عشر سنوات وبينهم اربع اطفال ومبسوطين جدا في حياتهم ويحبون بعض بس محمد فيه عيب واحد انه اذا عصب ما يشوف الي قدامه بس بسرعه يهدى ومنيره عارفه طبعه وراضيه واذا شافته عصب تحاول تمتص غضبه وتهدي الامور
في يوم من الايام تهاوش مع منيره ويتلفظ عليها قامت راحت عن وجهه وقالت الله يهديك جا في اليل وجاب لها هديه وقال سامحيني يالغاليه غصب عني ما اقدر امسك اعصابي وانا عارف هالطبع مو زين فيني قالت منيره ما عليه انا زوجتك اذا ما تحملتك مين يتحملك
في مره دخلت الشبكه العنكبوتيه وبرضوا دخلت نفس المنتدى النسائي الي كانوا فيه رنا وهيله
وشافت موضوع مكتوب الي زوجها عصبي تدخل قامت دخلت بسرعه على اساس بتلاقي حل يهدي زوجها وتمتص عصبيته
قامت كتبت حتى انا زوجي عصبي واحيانا يقول كلام ما يدري عنه من عصبيته بس عقب يراضيني ويعترف بغلطه وانا متحملته لاني اعرف انه غصب عنه
طبعا العضوات الكل ادل بدلوه ومن بينهن صاحبتنا ابهدم بيتكم
كتبت
يؤؤؤؤؤؤؤ وشلون تسمحين له يسوي فيك كذا لو انا مكانك ارد عليه بدال الكلمه عشر واطلب الطلاق مستحيل اعيش مع مثل هالشخص هذا وحش شلون عايشه معه !! يهين كرامتك ويذلك وترضين عليه بعد انتي عانديه ومشي كلامك عليه وفي الاخير بيرضخ لاوامرك صدقيني!!
انتي انسانه ما عندك كرامه اسمحي لي تستاهلين الي يجيك

طبعا الشيطان صديق ابهدم بيتكم جا لها يوسوس لها ويقول اي والله ان كلام ابهدم بيتكم صدق انتي انسانه ما عندك كرامه وشلون ترضين بهالحال
مر كم يوم وصارت مشكله بين الاطفال وكان محمد توه جاي من الدوام وكان يومه متعب مره وهلكان من التعب وعصب على العيال وقال لهم كل واحد غرفته قامت منيره قالت بشويش عليهم قال لها لا تتدخلين قامت تذكرت كلام ابهدم بيتكم قالت لا ترفع صوتك علي ويا اولاد اجلسوا العبوا براحتكم قال لها وشو ما سمعتك !!قالت احترم نفسك ولا عاد ترفع صوتك علي ما بسكت لك بعد اليوم قام قال لها وش بتسوين يعني قالت انت انسان لا تطاق ابيك تحترم نفسك ولا تطلقني قال خلاص اسكتي لا تنبشيني قالت لا ما بسكت انت عصبي ووانا تهين كرامتي وساكته لك انت ماخذني من بيت اهلي معززه مكرمه و.. و..الخ
قال لها تعوذي من ابليس انا طالع قالت ما تطلع حتى تطلقني طنشها قامت وقفت عند الباب وقالت تطلقني وهي واثقه انه ما بيطلقها بس تبي تقهره
قام قال انتي طالق ..هنا تجمدت كل اطرافها .وهو فتح الباب وطلع من البيت ..وراحت تبكي وتكلم امها وتقول لها كل السالفه قالت امها انتي الغلطانه يعني انتي عارفه طبع زوجك من زمان مو اول مره وهالحين ما صار يعجبيك !! وهو كان يقول لك من اول اذا عصب مو بيده غصب عنه الله يهديك يا بنتي الله يهديك

وقفه

إن صبرت المرأة على زوجها فلها أجر الصبر على البلاء ، كما قال
الله ( إنما يوفى الصابرون أجرهم بغير حساب ) الزمر /10.

لفته
شخصية ام الخير تمثل كل عضوه تتقي الله في ردودها وتضع الله سبحانه وتعالى نصب عينيها قبل الكتابه

شخصية ابهدم بيتكم تمثل كل عضوه تنسى او تتنسى قوله تعالى مايلفظ من قول الا لديه رقيب عتيد وتبث افكارها الهدامه في عقول العضوات

أتمنى يحوز الموضوع على اعجابكم ..

مما راق لي ..

ساحبه جلنط الأربعاء يناير 28, 2009 6:28 pm

مشكوره على الموضوع

وعن جد فيه ناس تخرب بيوت غيرها بالفتنه

لاكن الله يبعد عنا هالاشكال

تقبلي مروري

**المهجوله جت com** الأربعاء يناير 28, 2009 7:00 pm

اول شئ مشكوره عالموضوع الحلووووووووو

ثانيا انا احس اللي تخلي الناس يتدخلون بحياتها انسانه غبيه حيل لانها هي انسانه عارفه زوجها او عارفه نفسها

ماتحتاج نصيحه من الناس

في الاخير الله يبعد عنا شر الناس المنافقين وهدامين البيوت ..............

يسلموووووووووووووووووووووووووووووووووو

**صيتهـ شآد آوغلو** الجمعة يناير 30, 2009 6:13 pm

سآحبه جلنط

مهجوله

شآكره مروركن

والله يبعد هالأشكال عن الجميع

ودي

**جودي** الإثنين فبراير 02, 2009 3:27 am

موضوع رائع واقعي من حيااتنااا

اعتقد كل انسان يختاااااار هل يكون مثل ام الخير

او اللي تهدم بيوت

اوافق المجهوله على كلامهااا ومدام عندي عقل ليش اخلي النااس يفكرون عني

**صيتهـ شآد آوغلو** الإثنين فبراير 02, 2009 11:08 am

شآكرررررررررره مروركم

’’’’

(أبهدم بيتكم ) و( ام الخير ) ,,,رآئعه

(أبهدم بيتكم ) و( ام الخير ) ,,,رآئعه

أبهدم بيتكم ) و( ام الخير ) ,,,رآئعه

رد: (أبهدم بيتكم ) و( ام الخير ) ,,,رآئعه

رد: (أبهدم بيتكم ) و( ام الخير ) ,,,رآئعه

رد: (أبهدم بيتكم ) و( ام الخير ) ,,,رآئعه

رد: (أبهدم بيتكم ) و( ام الخير ) ,,,رآئعه